Romans 10
Gaiciyaga N Seida-zhin-yi
1Omi azaje omi bugba ɓeye n mi aduwa yi nu nyi nge a Yahudiyi ɓa bwa gni-gni. 2Mi kpe ɓa bugbadna ye lo n ɓa cei lo ntu Shekwoyi latu ɓo, ama bugbadna deye zhin gbeloyi nu. 3Ntuge ɓata kpe genyi lo nge Kristi la fi ntu ge wa zhin ɓa zhi n Shekwoyi aba, ama ɓai zeze ɓai zhin atna ɓa zhin ɓemana n na bai ɓa bwa Shekwoyi agmada dna n na Yahudiyi a wyidna n na knunu yi, ama ɓa nu to zhin Shekwoyi gni-gni zokwo m. 4Ɓata kpe genyi lo ge, Kristi ga aza nu n ɓa ga gaiciya, anya vinya n ɓa zhin atna ɓa bwa, dna n na awyidna bwashin. Woɓo ku ce zo vinya.5Ntuge Musa ɓei ku ka, ge ngye oza ɓa mi wa zhin ɓemanayi, to wa zhin ɓenukwoyin, wa gyi nasara n jarabai dna n wo asese, n na ba yi nu, n naɓa zhin wo gafara wa pwo!
6Ama gni-gni n kwo ɓe ntu gaiciya ga ɓo kwo cige, “Koto n na apmai lo ba zan nshemi ntuge ha gmi Kristi ɓe n cei n wa bma ho zhin. 7Koto n na apmai lo ha lo ho zan wo shin dna n na azafin aba ha jewo ze ɓe ncei n efin.”
8Ntuge gni-gni n kwo ɓe dna n gaiciya ga n Kristi, ekwo nu zhin nya n yi zhin waʼazi, kwo to mwa kpa lon n zaho-zaho yin, ɓehin-hin kwo wo viviyi lo n yi ngye, eyi abugba n yi agbei. 9Ntuge n ha gna aza n ho gbeyi nge Kristi Yesu nu zhin ho Dagayi ha ga gaiciya nho bugbami nge Shekwoyi lawo laka n vingwo, ho ɓa pwo. 10Gama dna n gaiciya ga nu nbugba n oza bwa gnigni manayi n Shekwoyi aba, n wo gbeyi nu njesun n wo gna aza owo gaiciya ga ɓo.
11Gama Shekwoyi ɓeda gna yi ge, oza to lo n wo ga Kristi gaiciya vinyikwo kwa wo won. 12A Yahudiyi n na tna kaciya zhinyi gmanyi nu, oɓa Dagayi gmanyi nu n wo gaɓa anya vinya, n ɓa nya wo n bugbai gmanyi nyi. 13Oza n wa yi Shekwoyi eye wo ɓa pwo.
14Ama ɓaɓa nya wo n wuna nge wo gniɓa a kpe baga gaiciya? Ɓai ɓa gawo gaiciya n wuna to ɓai wo wo ɓon ma? Ɓai ɓa wo wo ɓo n wuna to ozai gna ɓan ma? 15Oza ɓa lo n wuna wo gna ɓa to ai tnu wo ma? Nya nu n Shekwoyi ɓeda da sanu n kwa ci n cei ge, “Gye shi oɓa apita bmiya oɓanu nɓa zhin bugba fun nabari manayi Shekwoyi nya waʼazi, ɓai ɓe n nabari a gmada nyai. Aza a yeyeyi nu aza n ɓa zhin Shekwoyi nabari manayi waʼazi nyi.”
16Ama aza vinya nu to n ɓa wo nabari manayi ɓa gwon. Ntuge Anabi Ishaya ɓei ku da “Dagayi nyikado la gaiciya ga ɓo n ma gna ɓa nyiʼa?” 17Ama gaiciya ga ɓe n Shekwoyi ɓeda wonu, Nabari manayi Kristi nya.
18Ama a Yahudiyi ma? Ɓaku Shekwoyi ɓeda wo? E, gama kwola lo aba n ɓa nyi vinya. Aku nabari manayi zhin waʼazi har anyi ce zhi ba. 19Ama ɓa ɓei ku awyega bwa (nge Shekwoyi ɓa ga aza je gni-gni to ɓai ya gwon?) E, ntuge tunyi n Musa sa, Shekwoyi ɓei ku gna ge, wo ɓa zhin owo aza ɓa wo oshe, wa zhin atna wa kun ɓa agyewyi n wa gni-gni ga abyedo atna cei. 20Ishaya ɓei je da ntna edna ge, aza nɓa to zan Shekwoyi shin ɓa ɓa bwa wo. 21Nsaiye, wo zhin atna lo wa si a Yahudiyi kpe, ama ɓa gyi abye na ɓenayi, to ɓai ye ge ɓa ɓem.
Copyright information for
GbrGAW